2.11.2009

Byrjað að reisa hús Náttúrufræðistofnunar Íslands

Nýtt hús Náttúrurfræðistofnunar Íslands er byrjað að rísa í Urriðaholti. Áformað er að byggingu þess verði lokið í október 2010 og þá geti Náttúrufræðistofnun flutt starfsemi sína í Garðabæinn. Uppsteypa sökkla er langt komin og góður gangur á framkvæmdum hjá Ístaki, sem er verktaki hússins.

Vegna hrunsins hefur ríkt óvissa um hvort eitthvað yrði af byggingu hússins. Upphaflega var áformað það yrði tilbúið haustið 2009, en óvissa hjá fjármálastofnunum setti allar áætlanir úr skorðum. Nýlega tókst hins vegar að ljúka lánasamningum og þá var ekki eftir neinu að bíða.

”Við erum mjög ánægð með að það skuli loksins, loksins ætla að sjá fyrir endann á húsnæðismálunum,” segir Jón Gunnar Ottósson forstjóri Náttúrufræðistofnunar Íslands.

”Í ljósi sögunnar er þetta ekki síst ánægjulegt, vegna þess að Náttúrufræðistofnun hefur verið óendanlega óheppin í gegnum tíðina með úrbætur í húsnæðismálum. Alltaf þegar eitthvað hefur átt að gerast, þá hafa utanaðkomandi aðstæður komið í veg fyrir framkvæmdir, þannig að þegar fór að syrta í álinn á síðasta ári þá hugsuðum við með okkur að þetta væri ekki einleikið,” segir Jón Gunnar.

Gísli Pálsson verkfræðingur og byggingastjóri Ístaks, segir að uppsláttur og steypuvinna muni standa í allan vetur og fyrirhugað sé að loka húsinu í lok febrúar eða byrjun mars. Framan af starfa 10-20 manns frá Ístaki við bygginguna, en þegar framkvæmdir hefjast innanhúss seinni hluta vetrar munu á milli 40 og 50 manns starfa þar.

Urriðaholt ehf. er eigandi húss Náttúrufræðistofnunar og tekur stofnunin það á leigu til 25 ára. Húsið er sérstaklega hannað utan um starfsemi Náttúrufræðistofnunar. Þar verður nýjustu tækni beitt til að tryggja varðveislu náttúrugripanna, sem margir hverjir eru mjög verðmætir og sjaldgæfir, en söfnun þeirra nær aftur til 1755. Meðal annars verður fullkomin hita og rakastýring í safnaskálum, en hún skiptir miklu máli til að tryggja varðveislu margra náttúrugripanna, sérstaklega þeirra sem eru þurrkaðir. Aðgengi að öllum náttúrugripum stórbatnar, svo og öll rannsóknaraðstaða.

Frægt er hvað Náttúrufræðistofnun hefur mátt bíða lengi eftir hentugum og varanlegum húsakynnum undir einu og sama þakinu. Stofnunin hefur verið í bráðabirgðahúsnæði við Hlemm í tæpa fimm áratugi og að auki með geymsluaðstöðu í leiguhúsnæði víða um höfuðborgarsvæðið. Rannsóknaraðstaða hefur verið frekar bágborin og geymsluaðstaða svo ófullnægjandi að ýmsir náttúrugripir hafa eyðilagst.

Arkís hannaði hús Náttúrufræðistofnunar Íslands. Það verður 3.500 fermetrar að stærð og mun standa við Jónasartorg, vestast á Urriðaholti. Bæjarstjórn Garðabæjar samþykkti að gefa torginu þetta nafn til að heiðra minningu Jónasar Hallgrímssonar, sem oft er kallaður fyrsti íslenski náttúrufræðingurinn. Húsið samanstendur af þremur kjörnum sem eru tengdir saman með millibyggingum.

Meginhlutverk Náttúrufræðistofnunar er að rannsaka íslenska náttúru og stunda skipulega heimildasöfnun um hana. Stofnunin skráir og safnar eintökum af plöntum, dýrum, bergtegundum og jarðamyndunum, stundar rannsóknir á þessu sviði og miðlar upplýsingum. Náttúrufræðistofnun veitir jafnframt ráðgjöf um nýtingu náttúrunnar og leiðbeinir um vernd og nýtingu hennar.