11.4.2008

Styttist í skóflustungu Náttúrufræðihúss

Hönnun á nýju húsi Náttúrufræðistofnunar Íslands í Urriðaholti er á lokastigi hjá Arkís arkitektum. Urriðaholt ehf. reisir húsið og leigir það til stofnunarinnar. Þórunn Sveinbjarnardóttir umhverfisráðherra mun taka fyrstu skóflustungu að húsinu í maímánuði.  Náttúrufræðistofnun tekur nýja húsið í notkun haustið 2009. Við það verður bylting í húsnæðismálum stofnunarinnar, eins og Jón Gunnar Ottósson forstjóri orðar það. Þar með lýkur hálfrar aldrar bið Náttúrufræðistofnunar eftir varanlegum heimkynnum, en stofnunin hefur verið í leiguhúsnæði við Hlemm í tæpa fimm áratugi. Jafnframt hefur rannsóknar- og geymslupláss verið leigt víða um höfuðborgarsvæðið.  „Þetta verður í fyrsta skipti sem öll starfsemi Náttúrufræðistofnunar verður undir sama þaki,“ segir Jón Gunnar Ottósson, forstjóri stofnunarinnar. „Ekki skiptir minna máli að þetta húsnæði uppfyllir allar kröfur um varðveisluskilyrði náttúrugripa og aðstöðu til rannsókna,“ segir hann.  Náttúrufræðistofnun Íslands verður í 3.500 fermetra sérhönnuðu húsi við Jónasartorg, vestast á Urriðaholti. Bæjarstjórn Garðabæjar samþykkti að gefa torginu þetta nafn í tílefni þess að 200 ár voru liðin frá fæðingu Jónasar Hallgrímssonar. Ekki aðeins er Jónas eitt ástælasta skáld þjóðarinnar, heldur hefur hann stundum verið kallaður fyrsti íslenski náttúrufræðingurinn.  Á vefsíðu Arkís má lesa eftirfarandi um nýja byggingu Náttúrufræðistofnunar:  “Hús Náttúrufræðistofnunar í Urriðaholti markar tímamót í hönnun vistvænna bygginga á Íslandi. Hönnunarferlið einkennist af ígrundaðri ákvarðanatöku sem mótast af þekktu alþjóðlegu umhverfisvottunarferli. Efnisval, uppbygging, innra fyrirkomulag og útfærsla kerfa eru öll mótuð út frá vistvænni hugsun. Ennfremur endurspeglast náttúruleg fyrirbæri í byggingunni, jafnt að innan sem utan. Athygli gesta og starfsmanna er dregin að náttúrulegum hringrásarferlum, t.d. með því að gera yfirborðsvatn af þaki sýnilegt og áþreifanlegt þegar það rennur niður húsveggi og út í tjarnir á yfirborði jarðar. Gróður þekur alla þakfleti og hluta veggflata. Tvöfaldur glerhjúpur umlykur skrifstofu- og rannsóknarými á efri hæðum. Ytra byrðið er hugsað sem einskonar hlífðarkápa, sem gerir notendum hússins kleift að opna glugga og loftræsa vinnurými sín náttúrulega, sama hvernig viðrar úti.  Jafnframt gegnir ytra byrðið því hlutverki að draga úr sólarálagi, en áprentað krystallamynstur, sem unnið er út frá frostrósamyndun, brýtur niður sólarljós og hefur þar af leiðandi sömu virkni og utanáliggjandi gluggatjöld. Byggingin er skorin sundur af tveimur gjám, þar sem aðeins mjóir glergangar og léttir stigar tengja saman byggingarhlutana. Þessir grönnu og gagnsæju tengigangar veita notendum byggingarinnar tilbreytingu frá skrifstofu- og rannsóknaumhverfinu. Þarna getur starfsfólkið stigið út í annan heim og komist í sterk sjónræn tengsl við aðliggjandi gróðurveggi, flæði yfirborðsvatns, veðurfar, himinn og sjóndeildarhring.”